Los turistes qu'Areces nun quería

Hai dellos años (nel 2006 creyo recordar) cuando hebía un ciertu maltar na población porque'l desgobiernu d'Asturies nun yera quien a trayer pal nuesu aeropuertu más vuelos baratos aparte del de EasyJet a Londres, el bandidu Areces dixo que los vuelos baratos nun yeren bonos p'Asturies porque namás traíen turismu de "baxa calidá". Esi sinvergoña quedóse tan anchu (que nel so casu ye bien, bien anchu...) ya otra miembra de la piara sociata, Migoya, añadió que colos vuelos baratos los asturianos dexaríen de dir a les cases rurales pa colar fuera, ya diba perxudicanos... en fin, declaraciones d'una baxeza intellectual que si nun mos afeutaren direutamente sedríen pa mexase de risa.

Per un lláu, los vuelos baratos nun yeren vistos por Areces como un serviciu a los ciudadanos asturianos, demientres que los ciudadanos d'otros países europeos sí tienen drechu a percorrer Europa a precios asequibles, los asturianos nun ñecesiten d'eso, o meyor dicho, hai torgaselo tolo posible, nun seya que si salen d'Asturies a otros países más civilizaos dense cuenta de lo qu'Asturies podría ser ya nun ye por culpa la Mafia ppsoE. Que viaxen a Benidorm, como "bonos españoles", pa tomar el "solecito" ya mediterraneizase bien...
Per otru lláu, paez como que'l turista européu que fai usu de los vuelos baratos ye un probetón que diba venir Asturies a poco más que xintar pinchos de baldre nos chigres, ya nun diba dexar ganancia dala...

Ye curiosu que yo escriba sobro'l turismu n'Asturies, cuando pa nada quiero que la economía asturiana sostengase sobro'l turismu. Como Asturianu que quier lo meyor pal so país prestaríame una Asturies reindustrializada, una economía productiva ya innovadora, que xenere trabayu de calidá... les economíes basaes nel turismu son xusto l'antítesis d'eso...
Pero bien, yá qu'el ppsoE, nel so paletismu ya incapacidá neuronal, anecia ya anecia en convertinos nuna "potencia turística", taba bien que polo menos supieren de lo que falaben...

N'Asturies nun hai turismu de fuera la península, nun hai más que dase una vuelta peles cais pa decatase que lo único qu'hai ye xente la meseta, ye dicir, xente de una de les economíes más probetayes d'Europa.
Fasta l'otru día pensaba que sedría dalgo común a tola Cornisa Cantábrica, pero non, nun ye asina. Santander, colos sos vuelos baratos a Alemaña, Irlanda, Bélxica... taba estráu de turistes europeos (de países toos d'un poder alquisitivu bien superior al español). El avión nel que vine dende Frankfurt venía fasta arriba d'Alemanes con botes de montaña ya mochiles que diben a Cantabria (l'antigua Asturies de Santillana) a esfrutar de les montañes que na so zona nun abunden. De verdá quedéme plasmáu cola cantidá de turistes estranxeros, n'Asturies en tol branu nun llevo vistos los que ví ellí nuna hora...
Nun sé, a lo meyor son los míos prexuicios, pero fuera yá de la tema de la so capacidá alquisitiva, paezme abondo más enriquecedor esti turismu proveniente de sociedaes más avanzaes que la nuesa, qu'esi otru turismu que vien equí (afortunadamente hai honroses exeiciones) a mamase nes vinateríes ya ver les corríes de toros sufragaes col dineru los asturianos.
Cuando menos, igual fasta pa poder atendelos la xente la hostelería deprendía un poco d'otros idiomes, envede tener qu'avezase a dicir "cafetito" ya "sidrita"...